De Junge Graofschup

De Junge Graofschup was een regionaol-culturele warkgroep, begun december 1955 in de Duutse Graofschop Benthem opezet deur de veurvechter van de Nedersaksische taal Arnold Rakers (1903-1965). De groep wol, inspireerd deur 't regionalisme in oost-Nederlaand, een briede discussie anzwengeln aover een medern 'Heimatbegrip' en 't deur de Duutse en Nederlaandse standaardtalen verdrokte Nedersaksisch (de 'moderspråke') uutbouwen töt zölfbewuste cultuurtaal. 't Was ien van de initiatieven veur 't anfietern van regionaole taal en cultuur die midden jaoren vieftig an weerszieden van de Nederlaands-Duutse grèenze opezet wördden. Mangs wördt weerummekiekend naor dizze initiatieven, grèensaoverschriedende contacten en samenwarkingsverbaanden verwezen as de Nedersaksische Beweging.

Bij de Junge Graofschop wolden ze heur niet vastebieten in oldmoedsigheid, mar veuruutkieken. 't Streven wördden uutespreuken um de nao-oorlogse vlochtelingen in de Graofschop Benthem uut de veurmaolige Duutse gebieden in 't oosten te integreren in heur neie Heimat. De Junge Graofschup verzörgde de uutgave van Karl Sauvagerd zien dichtbundel De Tied blif Baas (Nothoorn: Pötters Verlag). 't Was de eerste boekuutgave waorin gebruuk wördden emeuken van een neie baoverregionaole Nedersaksische schriewieze, de Vosbergenschriefwiese, mit ontwörpen deur Rakers. De Tied blif Baas was de eerste uutgave van een beoogde 'schriftenriege' van De Junge Graofschup, mar 't bleef bij dizze iene uutgave.

In heur logo gebruukte de warkgroep de Vorbergenschriefwiese veur de eigen name: 'DE JUNGE GRÅÅFSCHUP'. In de pars wördden de makkelijker te drokken schriefwieze 'De Junge Graofschup' gebruukt. 't Logo bestund wieder uut een estileerde weergave van de Heergod van Benthem, een in de Börg Benthem bewaarde, van Benthemer zaandstien emeuken sculptuur van Christus an 't kruus en ien van de oldste anwiezings van 't christendom in noord-Duutslaand.

Nao een antal jaor raakte Rakers teleurgesteld in 't uutblieven van de verhaopte renaissance van 't Nedersaksisch, en trök e hum terogge uut de openbaorheid um hum bezig te holden mit zien aandere olde liefdes, de filesofie en de theologie. Een aandere betrökkene bij De Junge Graofschup was de schriever Arno Piechorowski.

Bronnen

• Helmut Lensing (2020), 'Die Niederdeutsch-Bewegung nach 1945 in den Regionen Grafschaft Bentheim, Emsland und Ost-Niederlande', in Osnabrücker Mitteilungen. Mitteilungen des Vereins für Geschichte und Landeskunde von Osnabrück (Historischer Verein), diel 125, Ossenbrügge, pp. 91-116.
• Helmut Lensing (2021), 'Die Bentheimer Plattdeutsch-Bewegung öffnet sich nach Westen', in Henk Bloemhoff en Henk Nijkeuter (red.), Jaorboek Nedersaksisch 2 (2021), Oosterwoolde: Stichting Sasland, pp. 50-61.
• A.R. [Arnold Rakers] (10 december 1955), 'De Junge Graofschup – Ein Arbeitskreis heimatverbundener fortschrittlicher Kräfte', in: Grafschafter Tagespost nr. 285.
• 't Swieniegeltje nr. 7, november/december 1955, p. 227.

Dit stok is eschreven in 't Zuudwest-Drèents.