Groot duvelsneigaoren
Groot duvelsneigaoren of gewoon duvelsneigaoren (Cuscuta europaea) is n parasitaere eenjaorige plaante die beheurt tot de wiendefamilie (Convolvulaceae). De plaante kömp van nature veur in Europa en in Azië.
.jpg)
De plaante wörden 30–150 cm hoog en hef n linkswienende, dikke draodvormige, greun- of geelachtige, meestentieds rood an-eleupen stengel. t Hef gien blaojen en wortels. Groot duvelsneigaoren dringt mit zuugworteltjes de waordplaante binnen. Hiermee haolt t voedingsstoffen en waoter bie de waordplaante vandaon.
Groot duvelsneigaoren bleuit van juni tot september mit roodachtig of geelachtig witte bloemen. De bloemkrone is in t begin buis-klokvormig en laoter kroesvormig. De kroonbuize is net zo lange of zelfs wat langer as de driehoekige, vrie spitse tot stompe kelke. De somtieds arg kleine, rechtopstaonde kroonschubben bin diep uuteraand tot tweespletig. De bloeme hef twee stielen. De lengte van de stiel en stempel bin bie mekaar op-eteld kleiner of net zo groot as t vruchtbeginsel, dit is niet zo bie klein duvelsneigaoren (Cuscuta epithymum).
De vrucht is n bolvormige vake naor boven kegelvormig versmalden, 2,5-3 millimeter grote deusvrucht, die an de voot overdwars los geet. In de vrucht zitten vier, hardschaolige zaojen. De draodvormige, bladloze kiemplaante greuit an de top en starft an de onderkaante weer aof, waorbie de voedingsstoffen weer opniej gebruukt wörden. As de kiemplaante in anraking kömp mit de waordplaante, dan wörden der zuugworteltjes evormp.
De plaante parasiteert veural op de grote braandnetel en hop, mer kömp oek op veule aandere plaanten veur, zo as op de gewone vlier en boerenwurmkruud.
Eventueel mit t veurvoegsel groot derveur.
- Achterhoek: duvelsneigaoren
- Veluws: duvelsneigaoren
- Twents: duwelsnaaigaren (Almelo)
Namen in aandere talen
bewark- Duuts: Europäischer Teufelszwirn, Nessel-Seide, Europäische Nessel-Seide, Hopfen-Seide
- Engels: Greater Dodder, European Dodder
- Frans: Cuscute d'Europe
- Nederlaands: groot warkruid
Uutgaonde verwiezing
bewark
|
Commons: Groot duvelsneigaoren - plaatjes, filmkes en/of gelüüdsbestanden. |