Grunneger Schrieverskring

De Grunneger Schrieverskring was een Nedersaksische schrieverskring veur de pervincie Grunnen, deur de dichter Jan Klompsma opericht op 2 meie 1956 bij Koos Kerstholt an 't Vismaart in Stad. Veurzitter was de dichter Jan Boer, vice-president Duut van Goor (Johanna Herolina van Goor-Duut), veurlopig sikketaoris Willem Diemer, pongholder Jan Klompsma en archivaris Remko Sipkes. Bij oprichting wördden as ereleden benuumd Knelis ter Loan, Jacob Rietema en vrouw Jant. Nienhuis.

't Doel van de Kring was um temiensen viermaol in 't jaor bij menare te komen um te risselveren aover Grunninger taal- en letterkunde en literair verantwoord wark ter taofel te brengen. Op die wieze mus 't anzien van de moudertoal verbeterd wörden. Der wördden estreefd naor contact mit naoberkringen in Nederlaand en Duutslaand, mit de Vereniging voor Nederlandse Letterkundigen en mit 't Nedersaksisch Instituut van de Rieksuniversiteit Grunning. Naost 't lidmaotschop veur schrievers in 't Grunnings was een 'butengewoon lidmaotschop' meugelijk veur lu die bename in 't Nederlaands schreven en een 'ankomend lidmaotschop' veur lu wie heur schrieverije ze wolden anfietern. Ok zette de Kring een Nikl. Griepfonds in 't ende, vernuumd naor de schrieversname van Grunninger schriever Jelte Dijkstra, um warken van veulbelaovende schrievers uut te kunnen geven.

Anesleuten schrievers kunden heur wark onder meer kwiet in 't Joarbouk van de Grunneger Schrieverskring Wenakkers (verschenen in 1957), 't Grunninger pergramma van de RONO, tiedschrift Dörp en Stad, 't orgaon van Grunningers buten de pervincie Grunnegers en Drenten under nander, de maondelijkse bijdrage in de Winschoter Courant en partie aandere neisblad-rubrieken.

Bronnen bewark

  Dit artikel is eschreven in 't Zuudwest-Drèents.