Hendrik Jan Bökkers

Hendrik Jan Bökkers (Deaventer, 16 juli 1977) is een neaderlandske musikant.

Bökkers groiden up in Heino in et oaverysselske Salland. Hee studeerden an de PABO in Zwolle en an de rockakademy in Tilburg, wår hee ouk an doceerden. Dårnåst was hee van 2000 tot 2005 sologitarist, frontsanger en leedtysskryver van de bänd Soundsurfer, wårmed hee döär Neaderland, Belgie, Frankryk en Spanje tuurden. In 2005 werd Bökkers sologitarist, (achtergrund)sanger en leedtysskryver van de achterhookse bänd Jovink en de Voederbietels. Vanaf ende 2007 (nå et stoppen van Jovink) is Bökkers aktiv as musikant (u.a. De Normaal Coverband) en producent in syn eigen studio.

Teagenwöördig maakt hee name med syn bänd Bökkers dee in syn eigen sallandske dialekt singt. Hyrmed geyt hee verskillende festivals in Neaderland af (u.a. Dauwpop en de Zwarte Cross) en hevt en groiende anhangersgrup. De neaderlandske radiosender 3FM hevt se inmiddels ouk evünden. In 2013 stünden se by Giel Beelen in et programma. In 2017 slöäten se et jår af in Paradiso.

In 2020 güng de band uut mekander, mär Bökkers had al rap nye spöälers by mekander, wårmed as de gruup weader voordan kunde. In 2021 deade Hendrik Jan Bökkers med an et TV-programma De Beste Zangers, wårmed as hee syn profil wyder uutbreidden. Underwyl starteden hee med streaktaalbeambte Albert Bartelds van de Oaverysselakademy nen podcast under den titel Nedersaksen.

Underwysprogramma

In 2019 is Bökkers vöär een pår dagen in de weake by et Ysselakademy anesteld üm een underwysprogramma te skryven vöär neadersassisk underwys up basisskolen.^[1]^[2]

Referensys

Dit artikel is eskreaven in et sallandsk, in de Nysassiske Skryvwyse.

[1] Hendrik Jan Bökkers hevt nye bane: "Nu echt van hobby beroop emaked"

[2] Rålter rocker Hendrik Jan Bökkers bejübelt streaktaal ouk in underwys

[1]

[2]