Lukas Koops (Grol, 1952) is een Drèentse schriever en bestuurder. Under zien publicaoties - in 't Drèents en Nederlaands - valt dichterij, columns, artikels, körte verhaolen, een roman, geschiedschrieving en interviews.

Loopbaon bewark

Koops hef Nederlaands en Fraans studeerd en was achttien jaor leraor Nederlaands en Fraans in Emmen. Hij hef in de Drèentse poletiek zeten as gemienteraodslid veur GroenLinks in Raol (1982-1987) en staotenlid veur dezölfde partij (1987-1995). Ok hef e veurzitter west van de (in 1996 ontbunden) Drentse Schrieverskring en bestuurslid van 't Huus van de Taol (veurhen Drentse Taol).

Tegenswoordig is Koops heufd gevarieerde programma's bij RTV Drenthe, waor as e ok 't cultuuragenda-pregramma 'Podium' prissenteert. Wieder is e redacteur bij Noorderbreedte, tiedschrift over Noord-Nederlaand. Hij hef zien eigen tekst- en communicaotiebureau.

Koops is bestuurslid van 't Huus van de Taol, anfieterinstituut veur de Drèentse taol.

Schrieverij bewark

Vanof de jaoren tachtig publiceert Koops in de Drèentstaolige tiedschriften Roet en Oeze Volk. Sund 2008 zit e in de redactie van Roet. Vanof 1989 dot e maotschappij- en cultuurkritische columns veur Radio Drenthe, partie regionaole kraanten en 't Maandblad Drenthe. In zien columns haolt e hard oet, beveurbield waor e gebrek an cultureel initiaotief in Drenthe bespeurt. Dizze kiek klinkt ok deur in zien fictie.

Koops zien roman Schoeltied (2003) giet over de relaoties maank een antal trouwde stellen en over de poletieke machinaoties in een klein Drèents dörp. Een neie inwoonster kreg daor een köppel underwiezers en olders tegen heur, umdat ze de veur 't directeurschap klaorsteumde underwiezer verslat en zölf directeur wördt. De roman Villa Thrianta (2018) giet over de roezige gang van zaoken bij een verzunnen regionale umroep.

In december 2008 kwam bij 't Huus van de Taol een videopetret van Lukas Koops oet, produceerd deur Albert Haar.

Publicaoties bewark

  • Dood spoor (dichtwark, 1993)
  • Scholders ophaolen (columns, 2001)
  • Schoeltied (roman, 2003)
  • Altijd in de buurt - Zestig jaar regionale omroep in Drenthe (saomenstelling, 2006)
  • Ingehaald door het verleden ('t levensverhaol van een NSB-dochter, 2008)
  • Drenthe verdeeld (over de gemientelijke herindieling van Drenthe, 2009)
  • Kamer 27 (boekenweekkedo, 2011)
  • Relus ter Beek. Een handelsreiziger in de politiek (1944-2008) (2015)
  • Gerard Nijenhuis. Dat ik besta komt door de taal (biografie, 2018)
  • Villa Thrianta (roman, 2018)

Citaot bewark

As ze net de eerste kwast vol varf op de deur oetstreken hef giet de bel. Ze kek naor de veurdeur en zöt deur het roetie het gezicht van Riekus Oosting. Ze vrag zuch of wat die bij heur an de deur doen komp. Anna zet de varfpot op taofel en lop met de kwast in de haand hen de deur.
'Moi. Zo, bi'j an 't vaarven?'
'Ja', zeg Anna körtof. 'Zeg 't ies.'
'Ik dèenk daj 't wel al heurd hebt, umdaj ok twei kinder op schoel hebt, maor meester Jalvingh is al twei weken ziek in hoes. [...] Umdaw as olders van de kinder die bij Jalvingh in de klas zit toch wel met hum te doen hebt wil wij hum nou geern een hart under de riem steken. Daorum zaomel wij in 't dörp handtiekens in en die wil wij hum dan anbieden in combinatie met een grote bos bloemen. Zuj ok je handtieken zetten willen op dizze liest?'
Anna is te verbluft um vortdaolijk te kunnen reageren. Een handtiekenactie veur een man die ziek in hoes zit, umdat e zien nederlaog niet accepteren kan. Hoe kuj 't bedèenken.
Oet Schoeltied

Oetgaonde verwiezings bewark

  Dit artikel is schreven in 't Midden-Drèents.