Roevène

Roevène (Nederlaans: Rouveen) is een dörp in de gemiente Stappest in de Nederlaanse pervincie Oaveriessel. In 2006 lèèfden d'r roem dreiduzend mèènsen. Mit 't naoberdörp Stappest is Roevène een veurbield van lintbebouwing an de Olde Rieksweg, die as zo'n acht kilometer laank is en van 't wegenkruuspunt De Lichtmis in 't zuudwesten töt in Stappest in 't noordoorsten löp.

In 't centrum an 't Kerkplein hej de grote Hervormde karke. Wieder bint d'r nog een köppel protestaantse karken. De lekaole middenstaand veur de dagelijkse beneudigdheden is goed verteengwoordigd, mar d'r bint gien grote winkelketens. D'r is een jonge dörpskern. Mit 't uutbreidingsplan Rouveen-West III bouwt ze veural in eing beheer sund 2004 een bulte ni'jbouwwonings.

Op Roevène hej drei basisskoelen. Veur 't voortgezet onderwies gaot de kiender naor skoelen in plaatsen as Stappest, Möppelt, Iesselmuun, Kampen, Ni'jlusen en Zwolle.

Cultuur

In vergelieking mit Stappest is 't antal vrouwlu det nog in klederdracht löp bedudend leger. Nog wal beholdt ze op 't dörp de zundagsröst.

Op 't Kerkplein viej 't monument veur de melkbusse, een eerbewies an de melkbusse, die as deur 't gebruuk van melktanks en automatisering vört is eraakt.

De Roevèènsen hebt heur eing volkslied, Bi'j de grote watertoren, in 1972 eskreven deur Jan Kruidhof. De watertoren slat op de olde watertoren an De Lichtmis (krek ten zuden van Roevène), now een restaurant. An De Lichtmis lig ok 't olde verdedigingswark de Bisskopsskaanze, ok wal de Roevènerskaanze.

Geboren, opegruid of woonachtig op Roevène

Hendrik Jan Korterink (15 mei 1955), misdaodjournalist en skriever
Bert Konterman (14 januari 1971), voetballer
Marc Houtzager (1971?), springruter
Jenita Hulzebosch-Smit (14 november 1974), skeuvelloopster
Geertjan Lassche (Zwolle, 17 augustus 1976), onderzuuksjournalist en documentairemaker
Gretha Smit (20 januari 1976), skeuvelloopster
Arjan Smit (28 april 1978), skeuvelloper, skeeler-leraar

Citaot

Stoer stiet nog de olde toren
eeuwen bint d'r langs egaon
Zelfs hef hi'j ien bange dagen
al een stormvloed ies deurstoan
Stoer stoat nog de olde ieken
dikke reuzen langs de weg
Mar het blieft nog steeds de "boompies"
zo as de Roevèènsen zegt
Stoer is 't volk ok van Roevèène
vlietig veur het daagluks brood
En kump iene ien ellende
helpt hum d'ààndern uut de nood

Uut Hendrik Sterken zien gedicht 'Drie-eenheid'. In: J.P. van den Berg c.s. (1986), Van Reestdal tot Beentjesgraven. Van Kievitshaar tot Kievitsnest, Zwolle: Natuur en Milieu Federatie Overijssel, blz. 53

Uutgaonde verwiezings

Plaatsen in de gemiente Stappest

Hoofdplaats: Stappest Dörpen: Roevène · De Rieverst
Buurtschoppen: Haalfweg · Hamingen · Lankhorst · De Leijen · De Lichtmis (deels) · De Punt · Slingenbarg (deels) · Westhuzingerveld (deels)

Oaveriessel · Steden en dörpen in Oaveriessel Nederlaand · Previncies · Gemientes

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.