Saksenoorlogen

De Saksenoorlogen (772 - 804) warren en koppel oorlogen tüsken et frankiske ryk van Grouten Karel en de saksen.

Ofbeylding van de verwoosting van de Irminsul, wat anleiding was vöär de Saksenoorlogen.

Achtergrund

Frankiske köäningen hadden töt dee tyd wal skatgelden kreagen van de saksen, mär se hadden der öär nooit echt under kreagen. De saksen hölden dårby noch altyd vaste an germaanske gelöyvsgebruken, leavden in lösse stamverbanden en güngen reygelmåtig up röyvtocht up frankisken grund. Et is nit düdelik of Karel eyrst enkel disse röyvtochten teagen wulde gån of dat hee medeyne de saksen der under wulde krygen en dwingen um kristelik te worden.

De Annales regni Francorum (Frankiske Ryksgeskydenisse) en de Vita Karola Magni (leavensbeskryving van Grouten Karel) beskryvet de Saksenoorlogen uutvorig, mär der sint håste ginne upgravingen dån. In disse geskrivten wördt untvolking en vordvoring enöömd, mär dit is nargens sou düdelik te seen as by de untvolking van Noordalbingië (Ditmarsken, Holsteyn en Stormarn) en de invoring van de slaviske Abrodyten.

Oorsaak en verloup

In 772 löät Grouten Kårel de Irminsule kapothauwen. De Irminsule was nen groten stam, pål of stükke holt wat nen wearldboum vöärstellen must. Dissen wearldboum (irminsule bedüdet letterlik sule van allens) stütteden volgens de germanen den heamel en de earde (allens) en wör dårüm as vöärname heilige steade anbeyden. Ouk wördt annöämen dat de steade wåras disse sule stünd ne belangryke gadderplaatse was, wår as alle saksen te hope köämen üm et Ding (rechtdag) te holden. Et kapothauwen van de Irminsule was düs medeyne nen anslag up et saksengelöyv en de saksen-"regeyring".

Dårüm stöäken de saksen in Deaventer Leevwin syne karke in den brand. Dat löät Karel neet unbestraffed. Hee tröäk der up an üm de saksen te bestraffen. In et summer van dat jår wün Karel eyrst: syn leager stöäk den Ryn oaver, et saksiske gebeed in. Dår veröyverden hee under meyr de Syborg (by Dortmund) en de Eresborg (by Marsbarg), wåras de Irminsule estån hebben sulde. Van dåruut tröäk hee up de Weser up an. Dår verslöäg he en saksenlaeger. Öären leider, Hessi, löät sik Kristen döypen. Up basis van dit sukses bespröäk Karel syne wydere plannen med en paar goodwillende saksiske edelmänne. En paar dårvan setten he vöär de seakerheid wal gevangen.

In 773 güng Karel når Italie, wåras köning Desiderius van de Longobarden de söäns van synen oaverleadenen bröder Carloman I in huus had. Under den westfaalsken leider Wittekind güngen de saksen voordan med vechten en wunnen Deaventer un en paar frankiske dörpkes en karken, vöäral in et hüdigendaagse düütske Rynland. Underwyl völlen de Engeren, en saksisk volk wat rund et hüdige Bremen woanden, et städke Fritzlar an. Dee wörden döar de franken verslån.

In 775 köäm Karel met nen krygsmacht oaver Syborg, Eresborg en Brunsbarg (by Höxter) by den rivyr den Oker, wåras en deyl van de saksen sik ewünnen gavven. Up de weg weaderümme güng Karel med syn laeger langs Hildesheym en Nordstemmen når de Bukkigouw rund Bukkeborg. Hyr hölden de engeren 'n antal franken in gevangenskap. Van dår uut tröäk Karel når "Hlitbeki" (Lübeake) üm syn laeger dår te helpen.

Nå weader nen veldtocht in Italie in 776 köäm Karel weaderümme når et saksiske gebeed, want de saksen hadden underwyl synen Eresborg kort-höwwen. Hee verslöäg se, wårup Wittekind vlüchten muste når Dänemarken.

In 777 wör vöär et eyrst in lange tyd nit evöchten. In dit jår was der vöär et eyrst ouk ne frankiske vergådering up sassisken grund, in de net estichtede Karlsborg. Dit was nen vöärlouper van de ryksdag. Der wörd emeynd dat dit was by et nudaagse Paderborn. Uutkumst van de beküerye was dat de saksen mär rap kerstend worden musten. Hyrvöär nöädigden se angelsassiske sendelingen uut Engeland. Grouten Karel had ouk gerne dat de karken en kloosters med öäre bookholdingsgebruken allens dale skreaven.

In 779 kreyg Kårel Oostfalen, Westfalen en Engeren der under.

Grouten upstand

Karel vermodeden dat de sassen sik skounwal nit sou lange händig sulden holden. Underwyl drükkeden Karel der heffingen döär, bestraffeden olde germaanske gelöyvsgebruken en dwüng de sassen üm kristen te worden. Dat makeden de sassen inderdaad weader upstandig. Wittekind was der weader uut Dänemarken en brachteden de sassen weader by mekander. Se deaden dörpe oavervallen van de frankiske Chatten in et hüdigendaagse Hessen. Se hadden sik dit mål wat beater organiseerd en durvden nu ouk in et lösse veld te vechten. Dit sassenlaeger bestünd in höyvdsaak uut buren. De höygere standen hadden sik by Karel anslöäten.

In de Slag by de Süntel verslöäg et laeger van Wittekind en frankenlaeger, terwyl as Karel selv gangs was med nen veldtocht teagen de Sorben.

In 782 höld Karel in Lipspringe nen ryksdag. Hyr deade he al et sassenland verdeylen in frankiske gråfskuppen. Dat sorgden weader vöär grouten upstand, den as Karel med harden hand de kop indrükkeden: hee gavven updracht vöär et berüchte Bloodbad van Verden, wårby as når et skynt 4500 sassen den kop ofhöwwen wör. Wat geskeedkündigen gelöyvet dit antal neet. See meynet dat der ne skryvfaute in de latynske geskrivten sulde stån: delocabat (= wegvoren) sul by ungelükke as decolabat (= höyvd afslån) eskreaven weasen. Hartog Wittekind sat underwyl weader in Dänemarken.

Karel kreag in synen oorlog teagen de sassen hülpe van sendelingen. Üm dee te beskarmen löät hee ne wet uutskryven: up yderen wund van nen sendeling en alle förme van minachting van et Kristelike ryksbestüür (swartmakerye van preesters of karken, uutvoren van olde gelöyvsbruken so as lykverbranding of vleisk eaten up vastendage) stünd den doudstraf of wegvoring. Ouk binnen Karel syn eygenen kring van vertrouwelingen vünden se dit toch wal an de harde kante. Den angelsassisken sendeling Elkwin skreyv Karel selvs nen breyv wårin as hee em vröäg of et ouk wat händiger kunde. Et Woord van God muste ja nit med en swaerd, mär med preydiken verspreided worden. Toch hölde Karel vaste an syne ungenadige kerstening. Et leyverden em de byname Sassenslachter up.

In 783 köm et by Detmold en by de Haze weader up vechten an. Sassiske vrouwlüde sulden hyr med bloute börsten up de franken weasen an evöllen. De kristelike franken warren hyr sou döär van de wyse brachted dat se de stryd verlöären. Fastrada, de latere vrouwe van Karel, löät sik hyrdöär skynbår nit van de wyse brengen en deed korrekt etselvde teagen de sassen. Der wördt wal bewäärd at Fastrada Karel et idee vöär et bloodbad van Verden inflüsterd had.

In 784 köämen de freesken de sassen helpen. Dat hadden se eyrder ouk al es edån. Toch köämen de sassen alvoordan meyr in et gedrang, undanks öäre vechtlüst. Den gröätsten ümmedrai köäm do as Wittekind sik in 785 döypen löät en Karel trouw beloavden. Den was ouk medeyne synen peetvader. In et neaderlandske deyl van et sassenland wör dårnå nit meyr vöchten.

Verwiezingn

Dit artikel is eskreaven in et twentsk.