Senegal

Senegal (officiääl de Republik Senegal) is en land in West-Afrika. Et is in et noorden nåbers med Mauritanie, med Mali in et ousten, Guinea in et süüdousten un Guinea-Bissau in et süüdwesten. Up et westen ligt den Atlantisken Oceaan. Senegal umslut souwat et heyle Gambia, en land wat up de overs van de Gambiarivyr ligt un wat et südelike senegaleeske Kasamance van de rest skeidet. Up sey grenst Senegal an Kaapverdie. De höyvdstad is Dakar.

République du Sénégal (fransk)
Vlagge van Senegal	Wåpen van Senegal
Ligging van Senegal
Basisgegeavens
Officiele språke	Officiääl: fransk, lingua franca's: Wolof, Engelsk, Fransk, Pulaar, Arabisk, Portugeysk
Höyvdstad	Dakar
Regeringsform	Unitäre presidentiäle demokraty
Godsdeenst	96.6% Islam 3.3% Kristendom
Geografy en bevolking
Uppervlakde - Water	196.712 km² 2,1%
Inwoanertal - Dichtheid	17.196.308 68,7 inw./km²
Koordinaten
Oaverige
Münteynheid	Westafrikaansken CFA-frank (XOF)
Tydzone	UTC (GMT)
Web | Kode | Tel.	.sn | SN | +221

Senegal is et meyst westelik liggende vasteland van Afro-Eurasie, de "Olde Wearld". De name hevt et land van de rivyr de Senegal, den as de noordelike un oustelike grense formet. Et hevt en typisk sahelklimaat, mär med en reagenseisoon. Et land is souwat 197.000 kilometer in et veerkant, un der woanet 17 miljoon lüde. Et is ne unitäre presidentiäle republik. Seyd de unafhangelikheid in 1960 steyt et land as eyne van de meyst stabile landen van Afrika to book.

Unafhangelikheid kreag et land do as et olde koloniale Fransk West-Afrika vryegeaven wör. Vanweage dee geskydenisse is fransk der de officiäle språke, mär blout en händkevul lüde versteyt et. De rest küert by mekander sou'n 30 språken, wårvan wolof de meyste sprekkers hevt; sou'n 80% van de lüde kent et as eyrste of tweyde språke. Nöäst fransk is et dårmed de lingua franca van et land. Lyk as andere nåkoloniale afrikaanske ståten is Senegal ne smeltkruse van språken un kulturen. De grötsten sint wolof, fula un serer. De meyste senegalesen sint anhangers van den islam.

Senegal is anemarked as en årm land med houge skulden. Up de wearldwyde unwikkelingsskåle steyt et 170. De meyste lüde warket an de küste as buur of viskerye. De anderen sittet vöärnamelik in de mynbouw, turisme un deensten. Der sint nauweliks delfstoffen to vinden. Souwat de hälvde van et ståtsgeld geyt når underwys. Et land is aneslötten by de Afrikaanske Uny, de Vereynige Natys, de Ekonomiske Gemeynskop vöär Westafrikaanske Ståten (ECOWAS), de Francophonie, de Islamitiske Samenwarking un de Gemeynskop van Sahelsaharaanske ståten. Internationaal is et land et bekendst ümdat et et eindpünt is vöär de Parys-Dakar Rally.