Slaviske völker

De Slaviske völker ümvat de indoeuropaeske völker dy ne tål uut de slaviske tålfamily spreakt en wördt an de hand van de onderverdealing van disse tålfamily ünderskeiden in Oost-, West- en Süüd-Slaven.

Lichtgruun: westslaviske tålen, Donkergruun: oostslaviske tålen, Blauw: süüdslaviske tålen

Öärsprong

Öär öärsprong as avsünderlik volke mot ümstreaks et 2e millennium v.Chr. eweast wean doo ok de Kelten, Germanen en andere indoeuropaeske völker sich gingen profilaeren. Töt an et begin van de jårtelling hylden de Slaven sich üp in Oost-Polen, Wit-Rusland en westelik Ukraine ründ de Pripjatmurassen. Sy leaven vöärnåmelik in de uutestrekte wolden in disse streak en in de slaviske mytology kan men hyr noch sporen van terügvinden.

Verspreiding van de slaviske völker

Kaarte van slaviske tålen in Europa

Nå de völksverhuusingen dy et westromeinsken ryk fatål wyren gingen ok de Slaven sich verspreiden åver Centrål-, Oost- en Süüdoost-Europa, wårby sy sich verdealen in dree hööfdgröpen:

Oostelike Slaven

Disse trökken richting Oost-Europa

• Russen
• Ukrainers
• Wit-Russen

Westelike Slaven

Disse vestigen sich vanaf ümstreaks den 6e eeuw in Midden-Europa wår sy de ruumte opvullen dee de når West-Europa etrökken Germanen hadden achterelåten.

• Polen en Kasjuben
• Tsjechen
• Slowaken
• Sorben
• Rutenen (Karpatie)
• Lemken
• Hutsulen

In de vrogge middeleeuwen nå de Völksverhuusingen leaven der düs Slaven in Centrål-Europa (Düütsland, Polen, Tsjechie), mår de düütske kolonisatsy nå et jår 1000 en de starker wördende invlood van de roomsk-katolyke Kark in de låte middeleeuwen drev öärlüde weer gedealtelik oostwårts. Nå de Twaeden Wearldoorlog wyr Midden-Europa (met nåme Sudetenland en et deal van Prüüsen dat now in Polen ligt) "esuverd" van Düütsers, en trökken vülle Polen en Tsjechen weer westwårts. Darnåst leavt noch altyd enkele slaviskspreakende minderheyden in Düütsland (Sorben), as ok in de (neetslaviske) landen Hongarye, Moldavie, Rumenie en de baltiske ståten.

Süüdelike Slaven

Disse trökken når den Balkan

• Slovenen
• Kroaten
• Bosniakken
• Serviers
• Gorani
• Montenegrynen
• Macedoniers
• Bülgaren (inkl. Pomaken)

In de vrogge en houge middeleeuwen hadden de süüdelike Slaven te måken med et bysantynske ryk en wyren der gedealtelik döär veroverd. Döär toodoon van disse ünderwarping mår ok döär vreedsåme handelskontakten en missionering wyr de bysantynske oosters-ortodokse kark verspreid ünder de Süüd-Slaven (en låter ok ünder de wyder når et oosten woanende oostelike Slaven). Nå den val van Konstantinopel måken sy deal uut van et ottomanske ryk, wat töt op heden an tallose kultürele invlöyden te sen is. Sinds den tyd bünt byvöärbeyld de slaviske Bosniakken moslim.

Nå den Aersten Wearldoorlog wyr et gebeed wår disse völker woant ok ünder aene nåme töt land edoopt, nåmelik Jugoslavie, wat ok Süüd-Slavie beteakent. De Bülgaren deden hyr neet an med. De süüdelike Slaven verskillen üpmarkelik genog betrekklik vülle ten opsichte van de andere slaviske völker (med nåme de eksjugoslaviske landen). Qua uuterlik geyt men der by de slaviske bevölking uut van blauwe ogen en betrekklik blond töt donkerblond hår. Nen grout deal van de süüdelike Slaven voldoot neet an disse kenmarken. Dit fenomeen is wellicht te verklåren döär de assimilatsy van andere völker by de Slaven (Kelten, Romeinen, Gryken, Goten, Türken en Illyriers).

Tål en religy

Russisk is de bekenndste tål in de regio, as twaede tål hev et wal vülle spreakers verloaren an et engelsk, dat der nå den val van et kommunisme steads belangryker wyr. De meeste mensen bünt der christelik-ortodoks, mår byvöärbeyld de Polen en Kroaten bünt in meerderheyd roomsk-katolyk. De Bosniakken behöärt med onder meer de Gorani en Pomaken töt de slaviske moslims.

Invlöyden

De slaviske kultuur hev ok in meer en mindere invlood üp de neetslaviske kulturen in Midden- en Süüdoost-Europa, zo as de düütske, hongarske, rumeenske, albaneske en noordgrykske cultuur. Sammen valt te spreaken åver ne middeneuropaeske ov ne Balkankultuur. De wedersydse invlood strekt sich vöäral uut üp kulinair gebeed.

In Dalmatie en Istrie is der jüüst meer invlood van de romaanske kultuur.

Vöär den Twaeden Waerldoorlog leaven der so en veer miljuun Joden in slavisk Europa. Döär den Holocaust en emigratsy når vöäral Israel en de Verenigde Staten is öär antal stark ereducaerd. De invlood van de jöödske kultuur, meer bepåld de jiddiske kultuur, üp sommige aspekten van de slaviske kultuur valt skonwal noch steads te marken. Andersüm is dit ok et geval.

Referentsys

Dit artikel is eskreaven in et achterhooksk.