Transnistrie

Transnistrie is een regio dee volgens de VN tot Moldavie behöyrt, et funktioneert lykewels as een selvstandige ståt. Transnistrie besteyt üüt een lange streapel land an de oustkante van de rivyr de Dnestr.

Република Молдовеняскэ Нистрянэ (Republica Moldovenească Nistreană)
Vlagge van Transnistrie	Wåpen van Transnistrie
Ligging van Transnistrie
Basisgegeavens
Officiele språke	rumäänsk (in t kyrilliske alfabet), russisk, ukrainsk
Höyvdstad	Tiraspol
Regeringsform	republik
Godsdeenst	oaverweagend russisk-ortodoks
Geografy en bevolking
Uppervlakde	4163 km²
Inwoanertal - Dichtheid	555.347 (2004) 133 inw./km²
Koordinaten	46° 49′ N, 29° 36′ O
Oaverige
Volksleed	Slăvită să fii, Nistrene
Münteynheid	transnistriske rubel (PRB)
Tydzone	+2
Nationale feystdag	2 september
Web | Kode | Tel.	.– | – | 373

Transnistrisk paspoort

Name

In Transnistrie hit et land Pridnestrovie. Trans beteykent 'boaven', en Transnistrie givt an dat et land, an de kante van Moldavie, boaven de rivyr de Dnestr ligt; Pridnestrovie beteykent 'by de rivyr de Dnestr'.

Sovjettyd

As underdeyl van de Sovjetuny makede et gebeed vanaf 1924 deyl üüt van een autonome, moldaviske sovjetrepublik binnen de ukrainske sovjetrepublik, mid een gemengde bevolking wårvan ukrainers en moldaviers de groutste bevolkingsgruppen waren. In 1940, nå de anneksaty van Bessarabie döär de Sovjetuny in nåsleyp van et Molotov-Ribbentroppakt, wördde de autonome republik untbünden en wördden de ses meyst westelikste distrikten, de distrikten mid de groutste koncentraty moldaviers, oaverebröcht nå de ny uprichtede moldaviske sovjetrepublik.

Nå de Sovjetuny

Up 2 september 1990 verklårde Transnistrie sik unafhangelik van Moldavie. De dårup volgende Transnistrie-oorlog, wårby sovjet-russiske truppen van et 14. sovjetleager up et ende betrökken rakede an de transnistriske kante, endigde mid een wåpenstilstand dee underteyekend wördde döär de russiske president Boris Jeltsin en de moldaviske president Mircea Snegur in Moskau up 21 juli 1992. De oavereynkumst ümmevattede een invoring van vreadestruppen üüt Rusland (5 bataljons), Moldavie (3 bataljons) en Transnistria (2 bataljons), en der wördde ouk een veiligheidszone inesteld tüsken Moldavie en Transnistrie.

Volgens een volksrådpleaging üüt 2006 dee üütevoord wördde döär de regering van Pridnestrovie stemde 97,2 % van de bevolking dervöär üm sik an te slüten by Rusland. Up 18 määrt 2014 deende Transnistrie een ansöök in by de Duma üm deyl van Rusland te wörden, mär dat wördde later weader inetrökken.

Transnistrie is vandage de dag een republik dee döär geen enkel ander land erkend wördt, behalve döär de internationaal neet-erkende ståten Abchazie en Süüdossetie. Et land hevt syn eigen regering, parlement, leager, polity en postsysteem. Dårnåst hevt Transnistrie ouk syn eigen grundwet, volksleed, vlagge en wåpenskild. Een grout deyl van de industry in Moldavie was enkel evästigd in Transnistrie, et verlees van disse regio hevt Moldavie dan ouk financieel swår etröffen.

De höyvdstad is Tiraspol.

Administrative indeyling

Distrikten van Transnistrie

Transnistrie is underverdeyld in vyv distrikten (raions) en twey städen.

Distrikt (raion)	Russiske name	Rumäänske name	Adm. centrum
Kamenka	Каменский район	Raionul Camenca	Camenca (Kamenka)
Dubossary	Дубоссарский район	Raionul Dubăsari	Dubăsari (Dubossary)
Grigoriopol	Григориопольский район	Raionul Grigoriopol	Grigoriopol
Rybniza	Рыбницкий район	Raionul Rîbnița	Rîbnița (Rybniza)
Slobodseja	Слободзейский район	Raionul Slobozia	Slobozia (Dnister) (Slobodseja)
Stad Tiraspol	Тирасполь	Tiraspol	Tiraspol
Stad Bender	Бендеры	Bender	Bender (Bendery)

Üütgånde verwysingen

• Transnistria Trafficking Arms On Europes Doorstep
• Websteade van de president van Transnistrie
• Pridnestrovie.net officiele websteade
• New York City Bar: Russia’s Activities in Moldova Violate International Law
• Viorel Dolha – All about Transnistria
• transnistria.blogspot.com – The truth about Transnistria
• – Fischka Photo Reportage on Transnistria

Dit artikel is eskreaven in et westveluwsk, in de Nysassiske Skryvwyse.