Vraauw

n Vraauw is n mìnsk mit twij of meer X- (zai onder aander triple X-syndroom) môr gain Y-chromosomen. t Symbool veur vraauwliekshaid is ♀. De vraauw is degaine dij n boarmouder en aaierstokken het, woardeur de vraauw degaine is dij n jong veurtbrengt. Ien de run van de geschiednis het de vraauw ook aaltied dijent wèst dij de kinder grootbrocht en veur t hoes zörgde. Ien t olle Griekenlaand, woar n hail ìnde manluu homoseksuweel waren, haar de vraauw enkeld de toak kinder te kriegen en veur t hoeshold zörgen, ien tieds dat de mannen zok mit mekoar en t leger bezeg huilen. Ien t olle Egypte doar ien tegen, haar de vraauw n grotere rol. Summege vraauwen binnen zulfs aan de macht wèst as farao, denk bieveurbeeld aan grote noamen as Nefertiti, Hatsjepsoet en Kleopatra.

Ien t Grunnegs wordt t woord vraauw ook broekt as aanduden veur n vraauwliekse echtegenoot. Dochs is t oorspronkelke woord veur dizze betaikenen wief, môr deurdat t woord wijf ien t Nederlaands n haile negatieve bieklaank het, wordt dit tegenswoordeg nait meer zo veul zègd. t Meervold van t woord vraauw is vraauwen, vraauwluu, vraauwlie, vruilie.

Kenmaarken

t Lichoam van n vraauw wordt kenmaarkt deur de volgende geslachtsorgoanen:

• Vagina. Ien de iengong zit t moagdenvlies (hymen) en aan t ìnde de boarmoudermond.
• Boarmouder
• Aaierstokken (ovarium) en aailaaiders (tuba)
• Schoamlippen en venusheuvel
• Clitoris (kitteloar)

Secundaire geslachtskenmaarken veur de vraauw binnen:

• drijhoukeg schoamhoar
• borstontwikkelen
• verbraiden van de bekken

Leegsaksisch

• Drèents:
  • vraauw
  • vrouw(e)
  • mèens(e) (informeel/negatief)
  • mèensk (informeel/negatief)
  • minsk (informeel/negatief)
  • wief (informeel/negatief)
• Grunnegs:
  • vraauw
  • wief (ook voak broekt om vraauwliekse echtgenoot mit aan te duden)
  • mìnsk (negoatief; voak bedould as olle vraauw)
• Stellingwarfs: vrouw
• Tweants:
  • vrouwe
  • meanske (euldere vrouwe, mangs ook negatief)
  • wief (negatief, mangs nog as grèpken bedoold)
  • vrommes
• Urkers: vrouw, weef
• Veluws:
  • vrouw(e)
  • vrouwmense
  • frommes
  • wief, weef (negetief)