Zwartewatersklooster

Veur et middelieuwse klooster moe'j bi'j Zwartewaterklooster wezen.

Zwartewatersklooster, ok 't Klooster, is een buurtschop in de gemiente Zwattewaeterlaand, in de Nederlaanse perveensie Overiessel. De buurtschop lig in de Kop van Overiessel en hef de naeme van et klooster dat daor in de middelieuwen lag. De buurtschop hef een stok of vuuftien huzen en zo'n veertig inwoners.

Ligging

De buurtschop lig rond de gelieknaemige weg, ten zuudoosten van De Sluus, ten noorden van Asselt, ten oosten van et Zwarte Waeter en de perveensiaole weg N331 (De Sluus-Asselt) en ten oosten van de buurtschop De Velde. Geografisch bekeken is Zwartewatersklooster een esdörp, elegen op een olde oeverwal van et Zwarte Waeter. In et oosten greenst de buurtschop an et netuurgebied de Olde Maoten in de gemiente Stapperst.

Geschiedenis

Et Zwartewaterklooster of Mariënklooster was een nonnenklooster dat in et jaor 1233 losedaone wodden as boetedoening veur de in 1227 in de Slag bi'j Aone ommekomen bisschop van Utrecht, Otto van Lippe. Op et end van de 16de ieuw, toe as et kloosterleven deur de Riffermaosie tot een ende ekomen was, hebben ze et klooster ofebreuken.

Töt 1811 völlen de buurtschoppen Zwartewatersklooster, Kievitsnest en De Velde onder et Scholtambt Asselterkarspel. In dat jaor wodden ze bi'j de gemiente Asselt edaone. In 1818 wodden ze daorvan ofesplitst en kwamen ze onder de gemiente De Sluus te valen. Bi'j de opheffing van die gemiente in et jaor 2000 kwamen ze bi'j de ni'je gemiente Zwattewaeterlaand.

De buurtschop Zwartewatersklooster vaalt now, ok veur de postadressen, onder et dörp De Sluus. Hoe dan ok vienen de bewoners van De Velde en Zwartewatersklooster heurzelfs gien Sluzigers of Asselters: de beide buurtschoppen hebben heur eigen identiteit.

Bronnen

• Plaatsengids.nl over Zwartewatersklooster

Dit stok is eschreven in et Stellingwarfs van de Kop van Overiessel.