Kleaine tromme

De kleaine tromme, skoarpe tromme of snoartromme (Engels: snare drum) is n slagwoarkinstrumeant wat bekeand is um zin skoarpe, ruusnde geluud. Det geluud krig he duur n mätjen van snoarn wat laanks et oondervel is espönn. Duur op de tromme te houwn wordt de snoarn an et triln ezat, woerbiej ze et vel raakt.

Snoartromme

De snoarn an de eunterkaante

In Europa wörd de kleaine tromme meestal op nen standaard ezat, of an een dreagbeugel of -reem met edreagn.

Beskriewing

De kleaine tromme besteet oet nen breden reenk (n kettel) van hoolt, keunststof of metaal. An de boawn- en oonderkaante van n kettel ligt een vel oawer de geater. Det wörd an espönnen duur ringe dee as net iets roemer um n kettel vaalt. Duur dee ringe stekt lange skroewen, dee as in blukke op den kettel stekt, de spanbusn. Duur de skoewen an te dreeien, trekt de metaalne ringe et vel strak. Tegen et oondervel zit een matjen van metaalne of keunststoffen snoarn. A'j op het slagvel houwt, wörd duur de drok et oondervel tegen et snoarnmatjen edrok, dee as doarduur trilt. Doarvan krig de kleaine tromme et skoarpe geluud.

Geschiedenis

De eerste snoartrommn hadn velle dee't emaakt warn van bloazn van deers, en nen eankeln doarm as snoare. Pas vanof 1956 wordt velle van keunststof emaakt.

In de late middeleewn (tusken 1600 en 1700) wör de tromme in Zwitserlaand in ezat vuur et begeleaidn van marsjeernde troepn (later wör hier meardere instremeantn an too evoogd, woerduur de militaire kapel ontsteund). De tromme wör gebroekt um verskeaidene bodskopn oawer te brengn. Zo warn der ofzeunderlike signaalstukke vuur et etn, vuur et kloarmaakn um te marsjeern, ezw. Dit gebroek wör in heel Europa oawer enömn. Vanof dee tied wördn de verskeaidene rudimeanten (bepoalde ritmiese basisfiguurn) ok noteerd en in lessen verwoarket. De leste 2 eewn hef de snoartromme völle ontwikkelingn met emaakt, zowal in slagtechniekn as in bouw.

In 1914 bedachn Robert Danly n mechaniek um de snoarn teegn, of van et vel of te dreein. Duur nen hendel oawer te haaln wordt doarmet de snoarn ongevear nen centimeter van et vel of edoan, woerduur't ze nit mear köant triln. Dit wörd doffe trom eneumd.

Met et onstoan van Jazz kwam de vroage noar kleainere tromn. Dee wördn toew zo an epast det ze in n drumstel past.

De ontdekking van keunststof hef völle veraanderd in wodöanig de snoartromme dr rechtevoort oet zut. n Kettel wördt rechtevoort van hoolt, metaal of keunststof emaakt en kan in iedern geweunsketen kluur eskilderd wordn. De velle wordt rechtevoort ook van keunststof emaakt, of mangs zelfs van kevlar. Ook de snoarn wordt rechtevoort van keunststof emaakt, of, vuur n dubbel zo skoarp geluud, van metaal.

Soortn

drumstelsnoartromme

Marsjeertromme tiedns ne wachtwissel

Amerikaanse tromme met Evans-vel

de Snoartromme is feailik in dree soortn te verdeeln.

• Drumstel- of orkestsnoarntromn
• Marsjeertromn
• Amerikaanse of Skotse (marsjeer)tromn.

Drumstel- of orkestsnoartromn

Dit soort wörd in orkestn en drumsteln gebroekt en is doarumme miskien rechtevoort wal et bekeandst. Ne normale moate vuur tromn is ongevear 35 cm in duursnee. Dit geeldt vuur alle soortn snoartromn. Ne normale drumstel- of orkestsnoartromme is ongevear 15 cm deepe, mear dr bestoat ook snoartromn van ongeveer 7,5 cm. Dee wordt pikkolotromme neumd, of in n volksmoond pannekookn, umdet ze zo plat zeent. Disse trumkes wordt vake duur kleaine keender in tradisjonele korpsn edreagn, umdet ze hoaste niks weagnt.

Marsjeertromn

Disse tromn wordt in tradisjonele korpsn bespöld en vuural in korpsmuziek gebroekt. t Verskil met n orkestsnoartromn is det disse dubbel zo deep zeent. Doarumme wordt disse ook wal depe tromme neumd). Hierduur kriegnt ze n voller, deper geluud, zodet t boetn wieter dreg.

n Spöller dreg t deenk an n reem oawer n rechterskoolder (woerduur't he skeef op t leenkerbeen haank) of an nen beugel oawer beaide skoolders, woerduur't he recht haank.

Skotse of Amerikaanse marsjeertromn

Skotse of Amerikaanse tromn hebt weainig verskil met de normale marsjeertromn. Toch kleenkt n Skotsen extra skoarp duur t gebroek van metaalsnaarn en extra strak op edreeide kevlarvelle. Dit kan nog verstoarkt wordn duur n ekstra snoarmatjen wat oonder t boawnste vel zit. Um de extra hoge spanning an te könn, hebt Skotse tromn rechtevoort extra dikke, verstewigde reande. Aanders kan t gebuurn det n raand duur de hoge spanning noar binn trekt en t hele instrumeant an bölle ligt. Skotse tromn wörd meesttieds bespöld met dikke, taps tooloopnde stökke met nen dikn kop. Hierduur onsteet n kort, dreug geluud.

Amerikaanse marsjeertromn kleenkt iets meender skoarp as Skotsn. Dit keump duurdet disse tromn keunststof snoarn hebt en de veln meender strak wordt op espönn. De snoartromn hoowt ja in Amerikaanse korpsn nit zo op de vuurgroond te wean. In de neegntiger joarn en was t wal ne gewoonte um ook de Amerikaanse tromme zo skoarp meugelik te loatn kleenkn. Hier komt ze noa t joar 2000 alverdan mear op terugge. De korpsn begeent öar tromngeluud op de bloazers of te stemn.

Velle

n good vel is belangriek bie kleaine tromn. t Boawnste vel, ook wal t slagvel eneumd, wör vroger van blöaze of maagn van deers emaakt. Mer doar houw iej makkelik duurhen. Rechtevoort (vanof 1956) gebroekt ze meesttieds keunststof, en mangs kevlar. Vuural bie Skotse en Amerikaanse tromn wörd völle kevlar gebroekt, umdet dit de hoge spanning better kan verdreagn.

Vroger wördn velle op espönn met töwwe, dee't an edreeid mosn wordn. At ze te hoge op edreeid wördn, skuurdn de velle in. Hierduur hadn tromn vake n dof, leeg geluud en was dr neet good op te artikuleern. Rechtevoort wordt velle in t fabriek al an nen metaaln reenk emaakt. Hier vaalt n spanraand van de tromme dan wier oawerhen. Met lange droadneageln wörd disn spanraand an spanbusn op n tromkettel vaste zat en an edreeid, woerduur t vel egaal oawer n kettelraand etrökn wörd.

Stokvoering

Dr beent 2 maneern um de stökke vaste te hooldn: n Geliekn en n tradisjoneeln greep.

Geliekn greep

geliekn greep

n Spöller heuld n stok tusken doem en wiesvinger. Hierbie lignt de aandere vingers wal um n stok hen, mear zorgt allene det n spöller n stok nit verlös. n Stok heurt in t verlengde te wiezen van n oarm, en de haande mut met de rugge noar boawn stoan. Dissen greep wördt duur völle drummers op n drumstel an eheuldn, umde'j zo de oarme ook noar boetn köant dreein en dus mear köant raakn.

Tradisjoneeln greep

tradisjoneeln greep

n Tradisjoneeln greep is bedacht vuur de tradisjonele marsjeertromme. De rechterhaande heuld n stok tusken doem en wiesvinger. Hierbie lignt de aandere vingers wal um n stok hen, mear zorgt allene det n spöller n stok nit verlös. n Stok heurt in t verlengde te wiezen van n oarm, en de haande mut met de rugge noar boawn stoan. Duur n stok in de leenkerhaande met t achtereande tusken doem en wiesvinger, en met de vuurkaante tusken middelvinger en reenkvinger te legn (en n wiesvinger en middelvinger oawer n stok hen te legn) hoof n spöller n oarm mear heel weainig umhoge te buurn. Zo kan he vanoet n pools nen slag maakn.

In vroger tiedn wördn tromn an nen reem edreagn. Hierduur hungn tromn skeef op t leenkerbeen. Zo mos n spöller n leekeroarm n heeln tied in nen roarn hook umhoge hooldn um nen goodn slag te maakn. Op n doer was dit slecht vuur de skoolders.

Völle korpsen kiest vuur n tradisjoneeln greep, umdet dit meuier lik ondaanks det ze de snoartromme vake horizontaal an n beugel hebt hangn. Dr beent ook korpsn dee't de snoartromme skuuns an n beugel hangt, umdet ze meant det ze aans geluudsverlees hebt met n tradisjoneeln greep en umdet dit better vuur n leenkeroarm is.

Braziliaans

In Brazilië wörd in sambagroepen de tromme vertikaal tegen de börste heulden. De dreagende haande spölt tuskenslage duur nen stok plat op n raand te leggen en ne doar op en dale te wippen, terwiel as de vrieje haande et heuwdritme spölt.

Soortn stökke

Spazzole-weejers

Kleine tromme kö'j met alle soortn stökke bespöln, mer wat zeent dr better vuur as aandern. Iej hebt ze laank, kort, dik, dun, zwoar, lecht, met t gewich vuur of achterin n stok, met nen dikn of nen dunn, of nen hooltn of nylon kop. Ieder soort stok gef zin eegne geluud. Drumstelspöllershebt vake dunnere stökke. Disse zeent lechter engeewt doarduur n zachter geluud. Et hoof ja ook neet zo hard, umdet et vake verstöarkt wörd en umdet aanders de rest van de instrumeantn oawerstemd wörd. n Korps wat völle boetn mut spöln gebrok dikkere stökke, umdet t geluud dan vearder dreg.

n Heel aander soort stökke beent de kwäste. Dit beent oetskoefboare weeiers met iezerne of nylon dröadkes, woermet oawer t vel wördt estrekn woerduur n zacht ruusnd geluud ontsteet.

Bekeande moarkn

Internasjonaal bekeande moarkn beent:

• Ludwig
• Premier
• Yamaha
• Pearl
• Dynasty

n Hollaands moark wat spesjaliseerd is in Amerikaanse tromn is Vancore.

Disse pagina is eskreewn in t Riesns