Ronduute
Ronduute (Nederlaands: Ronduite) is een buurtschop in de gemiente Steenwiekerlaand in de Nederlaandse perveensie Overiessel. In 2008 woonden d'r dartig meensen.[1]
De buurtschop lig tussen de Beulakerwiede en de Belterwiede op een soortement schiereilaand en wodt grotendiels evormd deur twee kampeerterreinen.
Geschiedenis
bewarkOp de Ronduute lag vrogger een redoute, een militaire verstarking op de krusing van de Arembergergrachte, een vaarverbiending tussen Frieslaand en De Sluus en de Veneweg, die sinds 1775 tussen de Beulaker- en Belterwiede deurlop. Ok daorvéur al was de Veneweg een belangrieke verbiendingsweg deur et veengebied tussen Möppelt en Veno. De naeme Ronduute komp van et woord redoute.[2]
Tussen 1884 en 1942 was an de Ronduute een punterwarf evestigd. De warf wodden daor esticht deur Jan Huisman en laeter voortezet deur zien zeune Wolter Huisman. D'r wodden punters ebouwd en ok aandere veur de Kop van Overiessel typerende vaartugen as et vlot en de bok. Disse warf en de warf van een aandere zeune van Huisman, Peter, in Wannepervene waren gedurende de eerste helfte van de 20e eeuw de belangriekste leveranciers van punters rond Kampen, an et Zwatte Waeter en an de Zuderzeekuste. Disse punters hadden anmarkelijk hogere boeisels en beschikten over twee langwarpiger zweerden as de punters veur Gieteren. Bovendien was de mast meer naor achter eplaetst, waordeur d'r meer ruumte was veur een fok. Ok aandere schepen zoas praemen wodden d'r ebouwd. Uut disse warf is laeter de internationaol bekende jachtwarf Huisman in Veno ontstaon.[3]
Op 6 december 1944, in de Tweede Wereldoorlog, stortten in Ronduute een Amerikaanse bommenwarper, een Boeing B17G neer. Van de acht inzittenden kwam d'r iene omme en de aandere zeuven wodden kriegsgevangen eneumen.
Rifferensies
bewark- ↑ Gemeente Op Maat: Steenwijkerland, CBS, 2009
- ↑ Henk Bruinenberg (1964), Noordwest Overijssel. Gisteren en vandaag (tweede drok), Steenwiek, p. 115
- ↑ Gait L. Berk (1999), De Punter (tweede drok), Haarlem
 | Plaatsen in de gemiente Stienwiekerlaand |  | ||||||||||||
|---|---|---|---|---|---|---|---|---|---|---|---|---|---|---|
Oaveriessel · Steden en dörpen in Oaveriessel Nederlaand · Previncies · Gemientes | ||||||||||||||
|
Dit stok is eschreven in et Stellingwarfs van Stienwiekerlaand. |